उमरखेड / मुलभूत सुविधांचा अभाव मात्र सक्तीच्या कर वसुलीचा नागरिकांवर दबाव !
ढाणकी नगरपंचायत प्रशासनाचा अजब कारभार.
ढाणकी / प्रतिनिधी :मिलिंद चिकाटे.
ढाणकी शहरात नगरपंचायत प्रशासनामार्फत कर वसुली ही जोरात सुरु असून,यामुळे सामान्य नागरिक मेटाकुटीस आलेला दिसून येत आहे. तसे पाहिल्यास ढाणकी शहरातील नागरिकांना कुठल्याही मूलभूत सुविधा या नगरपंचायत मार्फत अजून तरी मिळाल्या नसल्याची नागरिकांची ओरड आहे. येथील रस्ते निकृष्ट दर्जाचे, आरोग्य सुविधा तोडक्या, शहराचा पाणी प्रश्न तर गेली कित्येक वर्षापासून उग्र रुप धारण करीत आहे. गंभीर असणारा पाणी प्रश्न गेल्या पाच वर्षात निकाली काढण्यात, नगरपंचायत सपशेल अपयशी ठरल्याचे सुद्धा नागरिक बोलून दाखवताना दिसत आहेत. एकंदरीत मूलभूत सुविधांचा अभाव मात्र सक्तीच्या कर वसुलीचा नागरिकांवर दबाव ! ढाणकी नगरपंचायत प्रशासनाच्या अजब गजब कारभारावर ढाणकीकर नाराजी व्यक्त करताना दिसत आहेत.
थकलेल्या करा अभावी टेंभेश्वरनगर मधील पाणीपुरवठा नगरपंचायत तर्फे बंद
शहरातील प्रभाग क्रमांक ७ व ८ टेंभेश्वरनगर मध्ये गोरगरीब सामान्य नागरिक राहतात. येथील गोरगरीब सामान्य जनतेची कराची थकबाकी असल्याकारणाने, ढाणकी नगरपंचायत प्रशासनाने येथील पाणीपुरवठाच बंद केला होता. परंतु माजी कृ.उ.बा.स. सभापती बाळासाहेब चंद्रे पाटील व ढाणकीचे नागरिक यांनी त्या ठिकाणी जाऊन तो पाणीपुरवठा सुरळीत करावा अशी मागणी प्रशासनाला केली. तद्नंतर पाणीपुरवठा सुरळीत करण्यात आला.
थकीत कराअभावी विद्येचे मंदिर असलेल्या स्व. गुलाबसिंग ठाकूर शाळेच्या मुख्याध्यापक कार्यालयास नगरपंचायतने ठोकले कुलूप !
येथील सर्वात जुनी असलेली स्व. गुलाबसिंग ठाकूर प्राथमिक शाळेच्या मुख्याध्यापक कार्यालयास थकीत कराअभावी नगरपंचायत प्रशासनाने कुलूप ठोकले. परंतु गावातील नागरिकांच्या रोषाला लक्षात घेऊन प्रशासनाने कुलूप हटविले.असेही नागरिक बोलत असल्याचे दिसून आले.
एकंदरीत नगरपंचायत प्रशासनाने नागरिकांना सर्व मूलभूत सोयी सुविधा द्याव्या व नंतरच कर भरणा करून घ्यावा. यासंदर्भात नगरपंचायत प्रशासन अधिकाऱ्यांशी ढाणकी येथील कृ.उ.बा. समितीचे माजी सभापती बाळासाहेब चंद्रे पाटील, ढाणकी शहर काँग्रेस अध्यक्ष अमोल तुपेकर, ढाणकी नगरपंचायत माजी उपनगराध्यक्ष जहीर जमीनदार,सामाजिक कार्यकर्ते गजानन मिटकरे,ज्येष्ठ नागरिक प्रदीप मिटकरे,सोसायटी अध्यक्ष बंटी वाळके, सुभाष गायकवाड, सुनिल बुरसे,साहेबराव वाघमोडे,शेख जब्बार,आनंद पोपुलवाड,प्रवीण जैन,शेख अनिस,पंकज नरवाडे,गजानन सुरोशे, यांनी सक्तीच्या कर वसुलीच्या अनुषंगाने चर्चा केली. यावेळी नगरपंचायत अधिकाऱ्यांनी सुद्धा नागरिकांना नाहक त्रास न देता सहकार्य करु अशी ग्वाही दिली.
नगरपंचायत प्रशासनाने सक्तीची कर वसुली न करता सामान्य गोरगरीब नागरिकांचा विचार करावा. शहराला कुठल्याही मूलभूत सुविधा नगरपंचायत प्रशासनातर्फे मिळत नसून मग कर वसुली सक्तीने का ? नगरपंचायत प्रशासनाने सामान्य नागरिकांना सहकार्य करावे
बाळासाहेब चंद्रे पाटील
माजी सभापती कृ.उ.बा.समिती
About The Author
