यवतमाळ जिल्ह्यातील अर्णी विधानसभा मतदारसंघाचे भाजपचे माजी आमदार राजू तोडसाम यांनी राष्ट्रवादी काँग्रेसमध्ये प्रवे
ब्युरो रिपोर्ट /एस. के. शब्बीर महागांव
आज प्रदेशाध्यक्ष ना. जयंत पाटील आणि खासदार सुप्रियाताई सुळे यांच्या उपस्थितीत राष्ट्रवादी काँग्रेस पक्षात जाहीर प्रवेश केला. आदिवासी समाजाचा एक प्रामाणिक, होतकरु नेता राष्ट्रवादीत प्रवेश करत असल्याबाबत ना. जयंत पाटील यांनी समाधान व्यक्त केले. तसेच राजू तोडसाम यांच्या पक्ष प्रवेशामुळे यवतमाळ जिल्ह्यात राष्ट्रवादी काँग्रेस पक्षाला आणखी बळकटी मिळेल, अशी अपेक्षाही त्यांनी व्यक्त केली. भाजपमध्ये जुन्या नेत्यांना डावलले जात आहे. त्यातूनच तोडसाम यांच्यासारखा नेता आज आपल्या पक्षात प्रवेश करत आहे, याचा आनंद वाटत असल्याचे ते म्हणाले.
आपले मनोगत व्यक्त करताना माजी आमदार राजू तोडसाम म्हणाले की, “मी भाजपमध्ये १० वर्षे काम केले. सर्वांना सोबत घेऊन गेलो. मला २०१४ साली आमदार म्हणून काम करण्याची संधी मिळाली. तेव्हा सत्ताधारी पक्षात काम करत असलो तरी विधानसभेत ना. जयंत पाटील यांचे भाषण आवर्जून ऐकायचो. विरोधकांनाही मी मानसन्मान देत होतो. आदिवासींच्या प्रश्नावर वारंवार आवाज उचलत असल्यामुळे देवेंद्र फडणवीस यांनी माझे तिकीट २०१९ च्या निवडणुकीत कापले. राष्ट्रवादी काँग्रेसमध्ये प्रवेश करण्याचा निर्णय घेतल्यानंतर फडणवीस यांनी मला बोलावून पक्षात थांबायला सांगितले. मात्र मी राष्ट्रवादीतच प्रवेश करण्याचा निर्णय घेतला. भाजप सोडत असताना माझ्या मागे ईडी लागेल याची मला चिंता नाही. मी आदिवासी माणूस असून माझ्याकडे काहीच नाही. चौकशी केली तरी काही सापडणार नाही”.
यवतमाळमधील पुसदचे राष्ट्रवादी काँग्रेसचे आमदार इंद्रनील नाईक यांनी यावेळी आभार प्रदर्शन केले. तोडसाम यांच्यासोबत यवतमाळ जिल्ह्यात राष्ट्रवादी काँग्रेस पक्षाचे काम वाढविणार असल्याची ग्वाही त्यांनी दिली.
या पक्षप्रवेश कार्यक्रमाला अल्पसंख्याक विकास मंत्री ना. नवाब मलिक, माजी आमदार संदीप बाजोरीया, प्रदेश सरचिटणीस शिवाजीराव गर्जे, यवतमाळचे जिल्हाध्यक्ष बाळासाहेब कामारकर, राष्ट्रवादी युवक काँग्रेसचे प्रदेशाध्यक्ष महेबूब शेख, राष्ट्रवादी विद्यार्थी काँग्रेस जिल्हाध्यक्ष रितेश बोबडे जिल्हा उपाध्यक्ष आदीब खान हे उपस्थित होते.
